Jon Branæs i NRK.
Jon Branæs i NRK. (Foto: Ole Kaland)

Jon Branæs tek permisjon som radiosjef og går til produsentjobb i P13

– Eg har sakna produksjonen, seier Branæs til Medier24.

Fungerande radiosjef i NRK, Jon Branæs, tek permisjon frå stillinga han har vore i sidan i fjor haust – og går inn i eit seks månaders vikariat som produsent i P13.

Branæs byrjar i slutten av desember, eller byrjinga av januar, og skal produsere morgonprogrammet «Tidenes Morgen».

– Eg saknar det. Eg tykkjer det er gøy å lage radio. No skal eg ikkje lenger fungere som radiosjef, så det passar veldig bra, seier Branæs til Medier24.

– Det er artig å vere produsent i ei morgonsending. Det er jo «prime time» for radioen, og P13 er ein spanande kanal å jobbe i.

I første omgang er vikariatet på seks månadar.

– Eg veit ikkje kva som skjer etter det. Kanskje eg får meirsmak og vil jobbe meir med produksjon, eller kanskje eg går tilbake i radioleiinga, seier han.

Branæs fortel at han forlét ei spanande stilling.

– Det var veldig interessant og spanande å vere radiosjef, med omlegginga som er gjort, digitaliseringa og det store radioskiftet. Samstundes var det utfordrande, så eg er glad for at eg fekk den sjansen, seier han.

Marius Lillelien er tilbake i stillinga som radiosjef, etter å ha fungert som mediedirektør for Øyvind Lund, som òg er tilbake.

Til toppen