GEIR NILSEN, redaktør og eigar av Langrenn.com (innfelt). Her på Beitostølen - klar for snø og sesongstart i 2015.
GEIR NILSEN, redaktør og eigar av Langrenn.com (innfelt). Her på Beitostølen - klar for snø og sesongstart i 2015. (Foto: Erik Borg, Langrenn.com)

Langrenn.com har levert solide resultat i fleire år. No vil Geir Nilsen selje nett­avisa

«Tida er inne», seier Nilsen til Medier24.

Førre veke vart det kjent at Langrenn.com, som har vore heileigd av Nilsen sidan 2010, er til sals.

Og det til trass for solid økonomi og sunn drift. Langrenn.com har levert solide resultat med 1,5 millionar kroner i driftsresultat – tre år på rad.

 

– Uendeleg mykje ugjort

På spørsmål om kvifor, fortel Nilsen følgjande på sms til Medier24:

«Det er en tid for alt, jeg begynner å føle at jeg har løpt min etappe, den var svært krevende og intensiv de første årene fra 2010 og noen år fremover for å få Langrenn.com opp i flyvehøyde. Nå kan vi egentlig bare surfe videre, men samtidig ser jeg at det er så uendelig mye ugjort, spesielt innen salg og marked hvor potensialet for en nettside som er nummer 1 for nasjonalidretten langrenn er enormt. Tiden er inne for at noen som er mere interessert enn meg i rene salg- og markedsaktiviteter legger ut på neste etappe og gjennom det tar Langrenn.com enda høyere til værs».

Han viser til Stian Hatleberg, advokat og partnar i Advokatfirmaet Buttingsrud DA, for ytterlegare informasjon.

Advokaten fortel at det ikkje ligg noko dramatikk bak salet, og at det ikkje er sikkert det skjer.

– Det er avhengig av marknaden, fortel han til Medier24.

Langrenn.com omsette i fjor for drygt 4,5 millionar kroner, og sat igjen med ein solid driftsmargin på 33 prosent.

 

Høg prisklasse

På spørsmål frå Medier24 om kva han ynskjer å gjere vidare, svarar Nilsen følgjande:

«Oppfylle en drøm jeg har hatt siden 1979, reise til Amerika for å oppleve USA, et land og et kontinent hvor jeg aldri har vært. Jobbmessig er min erfaring at når en dør lukkes, da er det minst 4-5 nye dører som åpnes».

– Kor mykje vil du vere nøgd med å få for selskapet?

«Det er naturlig nok høy prisklasse på nummer 1-nettstedet for nasjonalidretten langrenn, publikum elsker gode nisjekanaler, uten at jeg vil tallfeste det her og nå, men jeg er også opptatt av hvem en kjøper blir, det er en viktig arv som skal videreføres og foredles videre», svarar han.

Medier24 laga for tre år sidan ein reportasje på Langrenn.com. Den gang fortalde Nilsen om sterke lesartal og at han i 2010 betalte tre millionar kroner for eit konkurstruga selskap.

Langrenn.com er eigd av selskapet Miraskogen, kor Nilsen er eineaksjonær.

Miraskogen driv òg, via selskapet Mira Handel, kjøp og sal av varer frå konkursbu, overskotslager og opphøyrssal, ifølgje Brønnøysundregistrene.

Til toppen